პარლამენტმა საარჩევნო კოდექსში ცვლილებების შეტანა და გენდერული კვოტების გაუმება პირველ მოსმენით მიიღო. ინიციატივას 82 მომხრე და 15 მოწინააღმდეგე ჰყავდა.
“დიახ, ქალებს უნდათ პოლიტიკაში მონაწილეობის მიღება, მაგრამ ეს რა თქმა უნდა კაცებმა არ უნდა გადაწყვიტონ. საქართველოს პარტიებში არ არის ისეთი შიდა დემოკრატია, სადაც შეიძლება, რომ ქალმა თანასწორობის პრინციპით მიაღწიოს იმას, რა კომპეტენცია და რა პროფესიონალიზმიაც აქვს”, — განაცხადა კანონპროექტის განხილვისას ოპოზიციონერმა დეპუტატმა, ხატია დეკანოიძემ.
თამარ კორძაიამ კი აღნიშნა, რომ პარლამენტში არაპოპულარულ თემებზე და პრობლემებზე მუშაობენ ქალები და სწორედ ეს არ უნდათ გაუქმების ინიციატორებს. მან ჩამოთვალა, როგორც მმართველი გუნდის, ასევე ოპოზიციონერი ქალი დეპუტატების არაერთი მნიშვნელოვანი ინიციატივა.
“ჩვენ ვართ ადამინები, ვინც ლაპარაკობენ ადამიანების პრობლემებზე ამ ქვეყანაში, ამ ქვეყნის 50% მოსახლეობის პრობლემებზე და თქვენ დღეს ამ ქალებს იმასაც ართმევთ, რაც აქვთ, რასაც თქვენ წყალობად უთვლიდით. სინამდვილეში შემთხვევითი შეკითხვა კი არ არის, ვინ გადაწყვიტა ეს საკითხი, ვინ ვის მოელაპარაკა.
თურმე, დარბაზში ელაპარაკნენ კაცები ერთმანეთს და გადაწყვიტეს, გადაუარონ ყველა იმ შრომას, რასაც ქალები 10-ჯერ მეტად ახორციელებენ და რა შედეგებსაც დებენ ქვეყნის წარმატებისთვის. ამაზე დასაფიქრებელი”, — განაცხადა კორძაიამ.
გენდერული კვოტების გაუქმებაზე კანონპროექტი გირჩის ინიციირებულია და ცნობილია, რომ მას საპარლამენტო უმრავლესობაც დაუჭერს მხარს. აღსანიშნავია, რომ კვოტები ქართულმა ოცნებამ 2020 წელს მიიღო. ამ კანონპროექტის ინიციატორები საქართველოს პარლამენტის შემდეგი წევრები იყვნენ: არჩილ თალაკვაძე, ირაკლი კობახიძე, ანრი ოხანაშვილი, დავით მათიკაშვილი.
კვოტირების მხარდამჭერი იყო გენდერული თანასწორობის საბჭოს თავმჯდომარე, ნინო წილოსანი. მან გირჩი 2021 წელს ღიად გააკრიტიკა, როდესაც გენდერული კვოტირების პრინციპებს გვერდი აუარეს და მათი სიით, დეპუტატებს შორის, აბსოლუტურად ყველა კაცი აღმოჩნდა. ახლა კი წილოსანი ამბობს, რომ კვოტები “პოზიტიური დისკრიმინაციის ფორმაა, რომელმაც გარკვეულწილად უკვე მიაღწია თავის მთავარ ამოცანას.
სახალხო დამცველის განცხადებით, დაგეგმილი საკანონმდებლო ცვლილებებით უგულებელვყოფთ ქალების მრავალწლიანი ბრძოლის შედეგებს და ვაუარესებთ თანასწორობის მისაღწევად არსებულ მექანიზმებს. ქალთა მოძრაობა კი ამბობს, რომ კვოტირების გაუქმების მსგავსი ინიციატივები არის ბრძოლა, არამხოლოდ პოლიტიკოსი ქალების, არამედ ამ ქვეყანაში მცხოვრები ყველა ქალის წინააღმდეგ.