სახალხო დამცველი შემაშფოთებლად მიიჩნევს რუსული კანონის საპროტესტო აქციაზე ჟურნალისტების მიმართ ფიზიკურ ძალადობას და აცხადებს, რომ მსგავსი ფაქტები არსებით საფრთხეს უქმნის ქვეყანაში მედიის თავისუფლების ხარისხს, შეიცავს საშიშ გზავნილს, რომ მედიის წარმომადგენლები, მათი საქმიანობის გამო, შესაძლოა, ანგარიშსწორებას დაექვემდებარონ.
იოსელიანი აცხადებს, რომ გავრცელებულ ვიდეო კადრში ნათლად ჩანს როგორ ურტყამენ პუბლიკას ჟურნალისტს ლექსო ქეშელაშვილს, რომელსაც სპეცრაზმის წევრებმა ტელეფონიც წაართვეს, რომელიც მოგვიანებით დაუბრუნეს. ასევე, ვრცელდება ინფორმაცია ტაბულას ჟურნალისტ გიორგი ბადრიძეზე ფიზიკური ძალადობის და ტელეფონის წართმევის და მედია აპრილის ჟურნალისტის გიორგი ბასხაჯაურის ცემისა და სიტყვიერი შეურაცხყოფის თაობაზე. იოსელიანი ასევე შეშფოთებულია ტელეკომპანია იმედის ჟურნალისტებისთვის საქმიანობის ხელშეშლის გამო.
“ხაზგასმით უნდა აღინიშნოს, რომ ჟურნალისტებს უნდა მიეცეთ საკუთარი საქმიანობის შეუფერხებლად განხორციელების შესაძლებლობა, მათ შორის შეკრების მონაწილეების მხრიდან. საქართველოს სისხლის სამართლის კოდექსის 154-ე მუხლით დასჯადია ჟურნალისტისთვის პროფესიულ საქმიანობაში უკანონო ხელშეშლა. კიდევ უფრო მძიმეა დანაშაული, როდესაც ხდება ჟურნალისტებზე ფიზიკური ანგარიშსწორება მათი საქმიანობიდან გამომდინარე. მსგავსი ფაქტები არსებით საფრთხეს უქმნის ქვეყანაში მედიის თავისუფლების ხარისხს, შეიცავს საშიშ გზავნილს, რომ მედიის წარმომადგენლები, მათი საქმიანობის გამო, შესაძლოა, ანგარიშსწორებას დაექვემდებარონ და ამდენად, მსუსხავი ეფექტის მატარებელია მათ მიერ გამოხატვის თავისუფლების რეალიზებაზე”, — აცხადებს იოსელიანი.
ლევან იოსელიანი მოუწოდებს სპეციალურ საგამოძიებო სამსახურს, მოახდინოს დროული და მკაცრი რეაგირება მომხდარზე და უზრუნველყოს საზოგადოების ინფორმირება გამოძიების მიმდინარეობის შესახებ.
“საგამოძიებო უწყებების სათანადო რეაგირებას გადამწყვეტი მნიშვნელობა ენიჭება როგორც ინდივიდუალურ შემთხვევებში კანონის უზენაესობის აღსრულებისთვის, ისე, ზოგადად მედიის წარმომადგენლებისა და საპროტესტო აქციის მშვიდობიანი მონაწილეებისთვის უსაფრთხო გარემოს შესაქმნელად”, — აცხადებს იოსელიანი.
რუსული კანონის საწინააღმდეგო აქციაზე გუშინ, 16 აპრილს სპეცრაზმელებმა მშვიდობიანი მოქალაქეების წინააღმდეგ წიწაკის სპრეი გამოიყენეს და ფიზიკურად გაუსწორდნენ, მათ შორის, ჟურნალისტებს, რომლებიც პროფესიულ მოვალეობას ასრულებდნენ. ნაცემია როგორც მედია აპრილის ჟურნალისტი, გიორგი ბასხაჯაური, ასევე, პუბლიკისა და ტაბულას ჟურნალისტები, ალექსანდრე ქეშელაშვილი და გიორგი ბადრიძე. ასევე, ცნობილია, რომ დაშავებულებს შორის არის სირცხვილიას აქტივისტი მარიამ დოლიძე.