რუსული კანონის საწინააღმდეგო აქციაზე მშვიდობიანი მოქალაქეების წინააღმდეგ სპეცრაზმმა ცრემლსადენი გაზი გამოიყენა. მოქალაქეების წინააღმდეგ სპეციალური საშუალება წინასწარი გაფრთხილების გარეშე გამოიყენეს.
ტელეკომპანია “ფორმულას” ინფორმაციით, აქციაზე გამოიყენეს რეზინის ტყვიებიც.
აქციის მოანწილეებს ჩიტაძის ქუჩის დატოვება სპეცრაზმის ძალადობრივი გამოდევნის შედეგად მოუწიათ. სპეცრაზმმა ცრემლსადენი გაზი რუსთაველის გამზირის მიმართულებით გაუშვა, რამაც აიძულა აქციის მონაწილეები ტერიტორია დაეტოვებინათ.
მათ ასევე გამოიყენეს წიწაკის სპრეი. გავრცელებულ კადრებში მკაფიოდ ჩანს, რომ სპეცრაზმი მოქალაქეებზე ძალადობს.
აქციაზე დაშავდნენ მოქალაქეები. მათ შორის არიან “პუბლიკის” ჟურნალსტები — ბასტი მგალობლიშვილი და ლიკა ზაკაშვილი.
დღევანდელი რუსული კანონის საპროტესტო აქცია პარლამენტში მიმდინარე პლენარული სხდომის პარალელურად დაიწყო. სხდომაზე რუსულ კანონს მეორე მოსმენით მუხლობივად განიხილავდნენ.
მშვიდობიანი მოქალაქეების შეკრების დაწყების შემდეგ, შსს-მ შეკრებილებს მოუწოდა, რომ პარლმანეტის შენობის შესასვლელი და გამოსასვლელი სივრცეები დაეტოვებინათ.
მოგვიანებით, გავრცელდა კადრები, რომლებშიც მკაფიოდ ჩანდა როგორ ძალადობდა სპეცრაზმი მოქალაქეებზე და გაფრთხილების გარეშე, სხვადასხვა სპეციალურ საშუალებას იყენებდა.
მოგვიანებით შსს-მ კიდევ ერთი განცხადება გაავრელა, რომელშიც ამტკიცებდა, რომ რუსული კანონის წინააღმდეგ აქციაზე შეკრებილი მშვიდობიანი მოქალაქეები სამართალდამცველებს სიტყვიერად და ფიზიკურად დაუპირისპირდნენ და მათი მიმართულებით სხვადასხვა საგანი ისროლეს.