საქართველოს პრეზიდენტი, სალომე ზურაბიშვილი რუსულ კანონს, მიღების შემთხვევაში, ვეტოს დაადებს. ამის შესახებ პრეზიდენტის საპარლამენტო მდივანმა, გიორგი მსხილაძემ განაცხადა.
“პრეზიდენტი, რა თქმა უნდა, გამოიყენებს თავის კონსტიტუციურ უფლებას და აღნიშნულ კანონზე ვეტოს დაადებს”, — განაცხადა სხილაძემ.
პრეზიდენტის საპარლამენტო მდივანი დღეს, 8 აპრილს გამართულ პარლამენტის ბიუროს სხდომას ესწრებოდა, სადაც განისაზღვრა, რომ ქართული ოცნების მიერ ხელახლა დაინიციირებული რუსული კანონი იურიდიულ საკითხთა კომიტეტს გადაეცეს. კომიტეტის თავმჯდომარის, ანრი ოხანაშვილის თქმით, განხილვა 12 აპრილს, პარასკევს დაინიშნება და მას ივნისის ბოლომდე მიიღებენ. ბიუროს მსვლელობისას, მსხილაძემ განაცხადა, რომ ეს კანონპროექტი საერთოდ არ უნდა დარეგისტრირებულიყო, მაგრამ ბიურომ მისი აზრი არ გაითვალისწინა.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
მდინარაძეს არ დაუმალავს, რომ პროექტის შინაარსი იგივე იქნება, ოღონდ სიტყვა “აგენტს” არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის: