ბუნდესტაგის საგარეო საქმეთა კომიტეტის თავმჯდომარე, მიხაელ როთი საქართველოს პრემიერს მიმართავს და კიდევ ერთხელ აცხადებს, რომ ბუნდესტაგის აბსოლუტური უმრავლესობა მკაცრად ეწინააღმდეგება რუსულ კანონს. როთი ასევე აღნიშნავს, რომ სოლიდარობა უცხადებს ამ კანონის მოწინააღმდეგე ქართველ ხალს.
“ძვირფასო კობახიძე, გერმანიის ელჩმა ჩვენი კანცლერის სწორი ციტირება მოახდინა!
მინდა, დაგარწმუნოთ, გერმანიის ბუნდესტაგის აბსოლუტური უმრავლესობა მკაცრად ეწინააღმდეგება “უცხოური აგენტების კანონს”. გთხოვთ, გაიწვიოთ კანონპროექტი!
სრული სოლიდარობა ქართველ ხალხს, რომლებიც დემონსტრაციებს მართავენ ევროკავშირის ღირებულებებისთვის”, — წერს როთი.
აღსანიშნავია, რომ მას შემდეგ, რაც გერმანიის კანცლერმა, ოლაფ შოლცმა ბერლინში საქართველოს პრემიერმინისტრ ირაკლი კობახიძესთან შეხვედრის შემდეგ გამართულ ბრიფინგზე განაცხადა, რომ “ევროკავშირს არ აქვს მსგავსი კანონმდებლობა“ და იმედი გამოთქვა, რომ საქართველო არ მიიღებს რუსულ კანონს, მმართველი პარტიის წევრებმა შოლცის განცხადების დამახინჯებაში ქართველი თარჯიმანი დაადანაშაულეს.
ამის საპასუხოდ, გერმანიის ელჩმა საქართველოში, პეტერ ფიშერმა შოლცის განცხადება ინგლისურად თარგმნა და X-ზე გამოაქვეყნა, ხოლო 12 აპრილს საქართველოში გერმანიის საელჩომ გერმანიის კანცლერის, ოლაფ შოლცის განცხადების ქართული თარგმანი გამოაქვეყნა, რომელშიც შოლცი რუსულ კანონს აკრიტიკებს და იმედს გამოთქვამს, რომ კანონს ამ სახით არ მიიღებენ. საელჩო კიდევ ერთხელ განმარტავს, რა განაცხადა მან საქართველოს პრემიერმინისტრთან, ირაკლი კობახიძესთან ბრიფინგისას.