შინაგან სამინისტროს განცხადებით, პარლამენტთან მიმდინარე რუსული კანონის საწინააღმდეგო აქციაზე “მართლწესრიგის აღდგენის მიზნით” გამოიყენეს “კანონით დადგენილი სპეციალური საშუალებები”.
უწყება ამტკიცებს, რომ რუსული კანონის წინააღმდეგ აქციაზე შეკრებილი მშვიდობიანი მოქალაქეები სამართალდამცველებს სიტყვიერად და ფიზიკურად დაუპირისპირდნენ და მათი მიმართულებით სხვადასხვა საგანი ისროლეს.
“მიუხედავად ადგილზე მყოფი პოლიციელების არაერთი მოწოდებისა და მათ მიერ გავრცელებული განცხადებისა, რომ გაეთავისუფლებინათ დეპუტატებისა და პარლამენტის აპარატის თანამშრომლებისთვის საკანონმდებლო ორგანოს გამოსასვლელები. მართლწესრიგის აღდგენის მიზნით, შინაგან საქმეთა სამინისტრომ გამოიყენა კანონით დადგენილი სპეციალური საშუალებები”, — აღნიშნულია განცხადებაში.
სამინისტროს განცხადების პარალელურად, აქციიდან ვრცელდება კადრები, რომლებშიც მკაფიოდ ჩანს, რომ სპეცრაზმი აქციის მშვიდობიან მოქალაქეებზე ძალადობს. მათ მოქალაქეების წინააღმდეგ წიწაკის სპრეიც გამოიყენეს.