ირაკლი კობახიძემ ბრიფინგზე თქვა, რომ მიიღეს გადაწყვეტილება, 2028 წლის ბოლომდე ევროკავშირთან მოლაპარაკებების გახსნის საკითხი დღის წესრიგში არ დააყენონ. ამასთან, როგორც ის ამბობს, ამ დრომდე უარს ამბობენ ყოველგვარ საბიუჯეტო გრანტზე, რომელსაც საქართველო ევროკავშირისგან იღებს.
იქამდე კობახიძემ ანტიდასავლური განცხადებები გააკეთა და ევროპელი პოლიტიკოსები გააკრიტიკა. მისი მტკიცებით, საქართველოს “არაკეთილმოსურნეებმა” ევროპარლამენტი საქართველოს წინააღმდეგ “შანტაჟის შიშველ იარაღად” აქციეს, რაც “ევროკავშირის უდიდესი სირცხვილია”. არგუმენტად კობახიძეს ქართული ოცნების ანტიდემოკრატიული ნაბიჯების საპასუხოდ, ევროპარლამენტის მიერ მიღებული რეზოლუციები მოჰყავს.
“ევროპარლამენტმა გასული 3 წლის მანძილზე მიიღო სიცრუითა და შეურაცხყოფით სავსე 5 რეზოლუცია, რომლებიც არათუ ქართულმა საზოგადოებამ, ევროკომისიამ და ევროპულმა საბჭომაც კი არ გაიზიარა”, — ირწმუნება კობახიძე.
გარდა ამისა, კობახიძემ ევროპელი პოლიტიკოსები ქვეყანაში რევოლუციის მოწყობის მცდელობაში დაადანაშაულა, რაშიც, მისი სიტყვებით, ისინი კანდიდატის სტატუსს იყენებდნენ. ამასთან, კობახიძე ირწმუნება, რომ ამაში ღიად იყვნენ ჩართული ორგანიზაციები, რომლებიც EU-დან იღებენ დაფინანსებას. მისი მტკიცებით, გადაწყვეტილების მიზეზიც სწორედ ესაა.
კობახიძის თქმით, ევროკავშირისკენ სვლას აგრძელებენ, თუმცა არავის მისცემენ საშუალებას, საქართველო “მუდმივი შანტაჟისა და მანიპულაციის რეჟიმში” დატოვონ.
“მიგვაჩნია, რომ ჩვენი დღევანდელი გადაწყვეტილება მნიშვნელოვან წვლილს შეიტანს ურთიერთობების გაჯანსაღებაში საქართველოსა და ევროკავშირს შორის. შესაბამის ევროპელ პოლიტიკოსებსა და ბიუროკრატებს, რომლებიც სრულად არიან დაცლილი ევროპული ღირებულებებისგან, ჩვენ მკაფიოდ უნდა დავანახოთ, რომ ისინი საქართველოს არა შანტაჟითა და შეურაცხყოფით, არამედ ღირსეულად უნდა ელაპარაკონ. მოლაპარაკებების გახსნის საკითხის გამოყენება საზოგადოების გახლეჩისა და მანიპულაციის ინსტრუმენტად, ევროკავშირს საქართველოში სერიოზულ რეპუტაციულ ზიანს აყენებს. ჩვენი დღევანდელი გადაწყვეტილება ევროკავშირს ამ რეპუტაციულ ზიანს სამომავლოდ აარიდებს თავიდან”, — ამბობს კობახიძე.
ყველაფრის მიუხედავად, კობახიძე ამტკიცებს, რომ საქართველო 2030 წლისთვის “ყველა კანდიდატ ქვეყანაზე მეტად იქნება მზად” ევროკავშირში გასაწევრიანებლად.