26 ნოემბერს მედიაში გავრცელდა ინფორმაცია, რომ ქართველი რეპერი და მსახიობი, კახა აბუაშვილი, იგივე „კაბუ“, ქალზე ძალადობის ბრალდებით დააკავეს. 27 ნოემბერს პროკურატურამ მას ბრალი სისხლის სამართლის კოდექსის სამი მუხლით წარუდგინა: 126-ე მუხლის პირველი ნაწილით — გენდერული ნიშნით დისკრიმინაციის მოტივით ცემა, რამაც დაზარალებულის ფიზიკური ტკივილი გამოიწვია; 151-ეს პირველი ნაწილით — გენდერული ნიშნით დისკრიმინაციის მოტივით ჯანმრთელობის დაზიანების მუქარა; 260-ეს პირველი ნაწილით — ნარკოტიკული საშუალების უკანონო შეძენა, შენახვა.
პროკურატურის ცნობით, გამოძიებით დადგინდა, რომ 25 ნოემბერს, თბილისში, ავტომანქანით გადაადგილებისას, კაბუმ მასთან მყოფ ქალს, ფიზიკური ტკივილი და სხეულის დაზიანება მიაყენა და დაზარალებულს ჯანმრთელობის დაზიანებით და დასახიჩრებით დაემუქრა.
„კახეთის გზატკეცილზე მსვლელობისას, შსს საპატრულო პოლიციის დეპარტამენტის შენობის მიმდებარედ, დაზარალებულმა შენიშნა გაჩერებული საპატრულო პოლიციის ავტომანქანა, ბრალდებულის ავტომანქანაში მყოფმა თ.ა.-მ, კარი გააღო და პოლიციას დასახმარებლად მოუწოდა. პოლიციელებმა ბრალდებულის მისამართით განახორციელეს დევნა, შეაჩერეს ავტომანქანა და დაზარალებულის მითითებით, კ.ა. ადგილზე დააკავეს“, — წერია პროკურატურის განცხადებაში.
გამოძიების ცნობით, ბრალდებულმა უკანონოდ შეიძინა და ინახავდა ნარკოტიკულ საშუალება „ალფა-პვპ-ს“, რომლის საერთო წონაც 1,28 გრამს შეადგენდა.
სამართალდამცველებმა ბრალდებული იმავე დღეს დააკავეს. პროკურატურის განცხადებით, უწყება აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს.