მარიამ ლაშხი ქართული ოცნების დეპუტატი და რუსული კანონის ერთ-ერთი მხარდამჭერია. მისი ინტერვიუ The News Agents-სთან, ამ ინფორმაციულად და ემოციურად დატვირთულ პერიოდშიც კი, ერთ-ერთი ყველაზე გახმაურებული და სოციალურ ქსელებში განხილვადი გახდა. მიზეზი მარტივია — დეპუტატმა თქვა, რომ “გლობალური ომის პარტია” არის “მასონების” მსგავსი ძალა.
“გლობალური ომის პარტიის” შესახებ კონსპირაციულ თეორიას ქართული ოცნება აქამდეც ავრცელებდა, თუმცა კონტრაქციაზე, რომელიც ხელისუფლებამ რუსული კანონის საპროტესტო აქციების საპასუხოდ დაგეგმა, პარტიის ლიდერმა ეს ნარატივი კიდევ უფრო განავრცო, რასაც ქართული ოცნების დეპუტატების მხრიდან ამ თემაზე გააქტიურებაც მოჰყვა.
თუმცა მარიამ ლაშხის შემთხვევაში სიახლეა ის, რომ მან არარსებული “გლობალური ომის პარტია” დაუკავშირა არარსებულ “გავლენიან მასონებს”. გარდა ამისა, დეპუტატმა ამავე ინტერვიუში მთელ მსოფლიოს მიულოცა ე.წ. ოჯახის სიწმინდის დღე, რომელიც საქართველოს კათალიკოს-პატრიარქმა, ილია მეორემ 2014 წელს დააწესა — მას შემდეგ, რაც 2013 წლის 17 მაისს სასულიერო პირებმა და მრევლმა ლგბტქია+ თემის წევრები და მხარდამჭერები ძალადობრივად დაარბიეს.
ინტერნეტის მომხმარებლებმაც არ დააყოვნეს და მარიამ ლაშხის ინტერვიუს შემდეგ არაერთი ხუმრობა შეიქმნა, რომლებსაც სტატიაში შემოგთავაზებთ.
აღსანიშნავია, რომ იმ ჟურნალისტის თქმით, რომელიც მარიამ ლაშხს ესაუბრა, ინტერვიუს კიდევ უფრო დიდი ნაწილი აღარ გააშუქეს.
“შეგვეძლო, ამ ინტერვიუდან კიდევ უფრო მეტი გვეჩვენებინა. ძალიან ბევრი გაგებით, გაოგნებული ვიყავი. მიუხედავად იმისა, სჯერა თუ არა მას [მარიამ ლაშხს] იმის, რასაც ამბობს, მრავალმხრივ შემაძრწუნებელი იყო”, — თქვა ლუის გუდალმა.