ევროკომისიის საგარეო საქმეთა სამსახურის სპიკერი პიტერ სტანო ქართული ოცნების მიერ ჰომოფობიური, ანტი-ლგბტ კანონპროექტის მეორე მოსმენით მხარდაჭერას აკრიტიკებს და ხაზს უსვამს, რომ ეს კანონი ქართველი ხალხის ფუნდამენტურ უფლებებს არღვევს.
„ევროკავშირი გმობს „ოჯახური ღირებულებებისა და არასრულწლოვანთა დაცვის შესახებ“ საკანონმდებლო პაკეტის დაჩქარებულ მიღებას მეორე მოსმენით.
ეს პაკეტი ძირს უთხრის ქართველი ხალხის ფუნდამენტურ უფლებებს და ზრდის იმის რისკს, რომ კიდევ უფრო გაიზრდება მოსახლეობის ნაწილის სტიგმატიზაცია და დისკრიმინაცია.
ევროკავშირი წუხს, რომ ისეთი კანონპროექტი, რომელსაც მნიშვნელოვანი გავლენა ექნება [საქართველოს] ევროკავშირში ინტეგრაციის გზაზე, მიღებული იქნა შესაბამისი საჯარო კონსულტაციებისა და ევროპულ და საერთაშორისო სტანდარტებთან მისი შესაბამისობის ანალიზის გარეშე.
ადამიანის უფლებების უზრუნველყოფა და დაცვა [ევროკავშირის] გაფართოების პროცესის საკვანძო ნაწილია, რომელიც ყოველწლიურად ფასდება ევროკომისიის გაფართოების ანგარიშში“ — განაცხადა პიტერ სტანომ.
ევროკომისიის სპიკერი ასევე აღნიშნავს, რომ ამ კანონის მიღება კიდევ უფრო დაამძიმებს საქართველოს ურთიერთობას ევროკავშირთან და მოუწოდებს „ქართულ ოცნებას“, გადახედოს თავის გადაწყვეტილებას და დაუბრუნდეს ევროპულ კურსს.
„ევროკავშირი მოუწოდებს საქართველოს ხელისუფლებას, მთლიანად გადახედოს საკანონმდებლო პაკეტს. ამგვარი კანონპროექტი, იმ შეზღუდვებთან ერთად, რომლებიც „უცხოური გავლენის გამჭვირვალობის შესახებ“ კანონმა დააკისრა სამოქალაქო საზოგადოებას, კიდევ უფრო მძიმედ იმოქმედებს საქართველოსა და ევროკავშირის ურთიერთობებზე.
ევროკავშირი შეგახსენებთ, რომ საქართველოს [ევროკავშირში] გაწევრიანების პროცესი ფაქტობრივად შეჩერებულია და ის მოუწოდებს ხელისუფლებას, დაუბრუნდეს ევროკავშირში ინტეგრაციისკენ მიმავალ გზას“ — აღნიშნავს პიტერ სტანო.
შეგახსენებთ, რომ დღეს საქართველოს პარლამენტმა დისკრიმინაციული და ჰომოფობიური საკანონმდებლო პაკეტი სახელად „ოჯახური ღირებულებებისა და არასრულწლოვანის დაცვის შესახებ“ დღეს მეორე მოსმენით მიიღო.
იხილეთ აგრეთვე ჩვენი სტატიები: