ევროკავშირის ელჩის, პაველ ჰერჩინსკის განცხადებით, ხელისუფლების მიერ ინიციირებული რუსული კანონი წინააღმდეგობაში მოდის ევროპულ ღირებულებებთან და ნორმებთან. მან ეს განცხადება არასამთავრობო სექტორის მიერ ევროკავშირის წევრობისთვის საჭირო 9 ნაბიჯის შესრულებასთან დაკავშირებული ანგარიშის პრეზენტაციაზე გააკეთა. ჰერჩინსკიმ ამ პრიორიტეტების შესრულებაზეც ისაუბრა და აღნიშნა, რომ ისინი იმდენად სწრაფად უნდა შესრულდეს, რამდენადაც შესაძლებელია.
ელჩის განცხადებით, რუსული კანონი არც ევროპულია და არც — ამერიკული. მან ასევე დასძინა, რომ რადგან ეს კანონი შეუთავსებელია ევროპულ ღირებულებებთან, ევროკომისიისთვის რთული იქნება საქართველოზე დადებითი შეფასების გაკეთება.
“ეს კანონი ევროპულ ღირებულებებთან და ნორმებთან შეუთავსებელია და განსაკუთრებით მიმდინარე კონტექსტში, ევროკომისიისთვის ძალიან რთული იქნება, გააკეთოს დადებითი შეფასება ამ კანონის მიღების შემთხვევაში. ეს კანონი არ არის კარგი; ეს კანონი არ არის ევროპული; ეს კანონი არ არის ამერიკული. მწამს, რომ მოიძებნება სხვა გზა გამჭვირვალობის უზრუნველსაყოფად, რაც აბსოლუტურად ლეგიტიმურია. ჩვენ არაფერი გვაქვს გამჭვირვალობის საწინააღმდეგო, ჩვენ ყველა ვემხრობით გამჭვირვალობას, მაგრამ ეს იმ ძალიან კარგი, ძალიან მნიშვნელოვანი და აუცილებელი სამუშაოს შეზღუდვის ხარჯზე არ უნდა მოხდეს, რომელსაც სამოქალაქო საზოგადოების ორგანიზაციები საქართველოს მოსახლეობის კეთილდღეობისთვის ასრულებენ. ეს უნდა სამოქალაქო საზოგადოების ორგანიზაციების სტიგმატიზაციის, მარგინალიზაციის გვერდის გარეშე უნდა მოხდეს. ისინი ძალიან მნიშვნელოვან როლს ასრულებენ ნებისმიერ დემოკრატიაში, მათ შორის საქართველოში”, — განაცხადა ჰერჩინსკიმ.
ჰერჩინსკიმ იმედი გამოთქვა, რომ გამჭვირვალობის უზრუნველსაყოფად სხვა იმგვარი გზა მოინახება, რომელიც სამოქალაქო საზოგადოების ორგანიზაციების სტიგმატიზებას არ გულისხმობს. ჰერჩინსკის თქმით, სიტყვისა და მედიის თავისუფლება არსებითია ყველა დემოკრატიისთვის.
ელჩმა საქართველოს ევროკავშირში გაწევრიანების გზასა და იმ 9 ნაბიჯზეც ისაუბრა, რომელთა წარმატებით შესრულების შემთხვევაში, ქვეყნისთვის კანდიდატის სტატუსის მიღების შემდგომი ეტაპი გაიხსნება. ჰერჩინსკიმ თავისი და 27 ელჩის სახელით აღნიშნა, რომ ქვეყნისთვის დრო იწურება.
“ჩემი და ევროკავშირის 27 ელჩის გზავნილი ისაა, რომ ცოტა დრო რჩება. საქართველოსთვის ყველა ინგრედიენტი არსებობს, რომ პროგრესს მიაღწიოს, შემდეგ ეტაპზე გადავიდეს და მოლაპარაკებები გახსნას, მაგრამ ეს უნდა გაკეთდეს ძალიან სწრაფად. 9 ნაბიჯი უნდა განხორციელდეს დროის ისეთ მცირე მონაკვეთში, როგორშიც ეს შესაძლებელია. აჩქარება გვჭირდება”, — აღნიშნა ჰერჩინსკიმ.
ელჩმა ასევე განაცხადა, რომ ევროკომისია ევროკავშირის გაფართოების შესახებ მოხსენებას, რეკომენდაციებთან ერთად, ოქტომბერში გამოაქვეყნებს.
“ეს რეკომენდაციები პოზიტიური იქნება თუ — ნეგატიური, ეს მხოლოდ იმაზეა დამოკიდებული, რამდენად სწრაფად და რამდენად გადამწყვეტად შესრულდება 9 ნაბიჯი საქართველოში”, — აღნიშნა მან.
ჩაგდებიდან 1 წლისა და დაახლოებით 1 თვის შემდეგ, ქართულმა ოცნებამ თავისივე სიტყვა გატეხა და რუსულ კანონს აბრუნებს. ყოველგვარი წინასწარი ინფორმირების გარეშე, ეს მამუკა მდინარაძემ 3 აპრილს დააანონსა და რამდენიმე საათში შარშან დაწუნებული კანონპროექტი პარლამენტის ვებგვერდზე აიტვირთა.
მდინარაძეს არ დაუმალავს, რომ პროექტის შინაარსი იგივე იქნება, ოღონდ სიტყვა “აგენტს” არ გამოიყენებენ. აქვე ქართულმა ოცნებამ მიგვითითა იმაზეც, რომ რასაც შარშან რუსული კანონად მოვიხსენიებდით, წელსაც იგივე არ ვუწოდოთ.
ქართულმა ოცნებამ 3 აპრილსვე დააინიციირა ჰომოფობიური, ადამიანის უფლებების საწინააღმდეგო ცვლილებების პროექტი, რომელიც, მათ შორის, შეკრებისა და გამოხატვის შემზღუდავ დათქმებსა და ცენზურას ითვალისწინებს.
ამავე თემაზე მეტი ინფორმაციისთვის: