დღეს, 11 ნოემბერს საქართველოში 8 ქვეყნის საგარეო საქმეთა კომიტეტის თავმჯდომარეების დელეგაცია ჩამოვიდა. დელეგაციის წევრები ფინეთიდან, შვედეთიდან, საფრანგეთიდან, ლიეტუვადან, ლატვიიდან, ესტონეთიდან, გერმანიიდან და პოლონეთიდან პრეზიდენტის ადმინისტრაციაში სალომე ზურაბიშვილს შეხვდნენ. შეხვედრაზე უარი თქვა პარლამენტის თავმჯდომარემ, შალვა პაპუაშვილმა.
როგორც პაპუაშვილი ამბობს, ევროპელ პარლამენტარებს შეხვედრაზე უარის მიზეზები წერილობით განუმარტა. ფეისბუქგვერდზე გამოქვეყნებულ ვრცელ განცხადებაში ის წერს, რომ დელეგაციის წევრებს ლიეტუვის პარლამენტის წევრმა, ჟიგიმანტას პავილიონისმა “მოუყარა თავი”, რამდენიმე მათგანს კი “ქართული საზოგადოების მიმართ მრავალჯერ გამოვლენილ პირად არამეგობრულ დამოკიდებულებაში” ადანაშაულებს.
“მიუხედავად იმისა, რომ საქართველოს ხელისუფლება რჩება ევროკავშირის ყველა რელევანტურ და დაინტერესებულ მხარესთან დიალოგის ხელშეწყობის ერთგული, შეხვედრების გამართვის ამ განზრახვას დადებითად ვერ ვუპასუხებ”, — წერს პაპუაშვილი.
გარდა ამისა, პარლამენტის თავმჯდომარე ამტკიცებს, რომ კონკრეტული ევროპელი პოლიტიკოსების ვიზიტის საფუძველი პოლიტიკური მიკერძოებულობაა და მათ წინასაარჩევნო კამპანიისას ოპოზიციის მხარდაჭერასა და მოქალაქეების ნებაზე უკანონო ზემოქმედების მცდელობაში სდებს ბრალს.
“არჩევნების უარყოფა და ამომრჩეველთა ასეთი ძლიერი ხმის იგნორირება ის გზაა, რომელსაც ოპოზიცია წლების განმავლობაში მიჰყვება და რასაც ქართული საზოგადოება უკვე შეეჩვია. თუმცა, როდესაც ქართული საზოგადოება ხედავს ევროპელი პოლიტიკოსების მიერ დემოკრატიის უარყოფას, ეს ევროკავშირისადმი ნდობას აზიანებს. აღნიშნულის გათვალისწინებით, შეუძლებლად მიმაჩნია მიღებულ თხოვნაზე დათანხმება”, — ნათქვამია პაპუაშვილის წერილში.
პაპუაშვილის ამ განცხადებას ლიეტუვის საგარეო ურთიერთობათა კომიტეტის თავმჯდომარე, ჟიგიმანტას პავილიონისმა უპასუხა. მან “საბჭოური” უწოდა ხელისუფლების წარმომადგენლების მიდგომას, არ შეხვდნენ მათ, ვინც მთავრობას აკრიტიკებს.
“ეს ძალიან საბჭოურია — ფაქტობრივად, ეს ტენდენცია 3-4 წლის წინ შევნიშნე: ვინც კი აკრიტიკებს საქართველოს მთავრობას, შეხვედრებს ვერ იღებს. აქ ჩამოვდივარ, არ ვიცი რამდენჯერ ბოლო 3 წლის განმავლობაში, მაგრამ შეხვედრები არ არის. შესაძლოა, ერთადერთი გამონაკლისი იყო, როცა შევხვდი საგარეო საქმეთა მინისტრის მოადგილეს, მაგრამ როგორც წესი, თუ აკრიტიკებ, მორჩა. ეს საბჭოთა მიდგომაა”, — განაცხადა პავილიონისმა.
პაპუაშვილის უარზე კომენტარი გააკეთა საფრანგეთის საგარეო ურთიერთობათა კომიტეტის თავმჯდომარე, ფრედერიკ პეტიმ. მისი შეფასებით, პაპუაშვილის ეს გადაწყვეტილება დემოკრატიის სრული უარყოფაა.
“ევროპაში ჩვენ ერთმანეთს არ ვეთანხმებით ხოლმე, მაგრამ ერთად ვმუშაობთ და ჩემთვის გასაოცარია, როცა პარლამენტის წევრი მეუბნება, რომ „არ შეგხვდები, იმიტომ, რომ არ გეთანხმები”. ეს ჩემთვის სრული უარყოფაა იმის, რასაც გულისხმობს დემოკრატია. ერთადერთი ადგილი, სადაც არ არის კონფლიქტი, არის სასაფლაო, მე არ მეჩქარება იქ”, — თქვა პოლიტიკოსმა.
პრეზიდენტთან შეხვედრის შემდეგ ადმინისტრაციაში პრესკონფერენციაზე განცხადებები გააკეთეს როგორც თავად ზურაბიშვილმა, ასევე, ევროპული ქვეყნების პარლამენტარებმაც. როგორც ზურაბიშვილმა აღნიშნა, დელეგაციის ვიზიტი მაშინ, როცა საქართველო ღრმა პოლიტიკურ კრიზისში შედის, ევროპული მხარდაჭერის ნიშანია.
“კრიზისი სახეზეა და ჩვენი მეგობრები აქ არიან, რომ ჩვენთან ერთად მოიპოვონ გზები, რომლითაც საქართველო გამოვა ამ კრიზისიდან. და გამოვა ამ კრიზისიდან, რაღაც მომენტში სამართლიანი ფორმით დავუბრუნდებით ახალ არჩევნებს, იმისთვის, რომ საქართველომ მიიღოს ლეგიტიმური პარლამენტი, ლეგიტიმური მთავრობა და ლეგიტიმური ახალი პრეზიდენტი, როცა ამის დრო მოვა. ესაა ჩვენი გზა, ჩვენი გზა არის სტაბილურობის, დემოკრატიის და ევროპის გზა, სხვა გზა საქართველოსთვის არ არსებობს და ჩვენი მეგობრები, ვინც აქ არიან, ამაში არიან დარწმუნებული”, — თქვა ზურაბიშვილმა.
გერმანიიის ბუნდესტაგის საგარეო საქმეთა კომიტეტის თავმჯდომარის, მიხაილ როთის განცხადებით კი, საქართველოში ჩამოვიდნენ, რათა სოლიდარობა გამოხატონ მოსახლეობის იმ ძალიან დიდი ნაწილისთვის, რომელიც ევროკავშირის წევრობისკენ ისწრაფვის. მისივე თქმით, ჩამოვიდნენ, რადგან შეშფოთებულები არიან საპარლამენტო არჩევნებით და ხელისუფლების ანტიდემოკრატიული პოლიტიკით.
ფინეთის საგარეო ურთიერთობათა კომიტეტის თავმჯდომარემ, იუკა კოპრამ საქართველოში არჩევნების გამოძიებაზე ისაუბრა და თქვა, რომ ამისთვის ყველაზე ეფექტური გზა საერთაშორისო თანამშრომლობა იქნება.
“ყველაზე ეფექტიანი და ნეიტრალური გზა, რათა შემოწმდეს, რა მოხდა საქართველოს არჩევნებზე, უნდა ჩატარდეს იმ ორგანიზაციის მიერ, რომელის საქართველოს ფარგლებს გარეთაა, იმიტომ, რომ ვხედავთ, რომ მმართველ პარტიას ძალიან ძლიერი პოზიციები გააჩნია სხვადასხვა ორგანიზაციაში ქვეყანაში, რათა დავარწმუნოთ არა მხოლოდ საქართველოს მოსახლეობა, არამედ მსოფლიოს დანარჩენი ნაწილი, რომ არჩევნები იყო სამართლიანი, თავისუფალი, საუკეთესო გამოსავალი იქნება, თუ საერთაშორისო თანამშრომლობის დონეზე ჩატარდება, მაგალითად ევროპის საბჭოს, ეუთოს ან სხვა მსგავსი საერთო სანდოობის მქონე ორგანოს მიერ”, — თქვა ევროპელმა პოლიტიკოსმა.
სალომე ზურაბიშვილთან შეხვედრის შემდეგ ევროკავშირის 8 ქვეყნის დელეგაციის წევრები პრეზიდენტის სასახლესთან შეკრებილ მოქალაქეებს შეხვდნენ.