სპეციალურმა საგამოძიებო სამსახურმა, პირადი ცხოვრების საიდუმლოს ხელყოფის ბრალდებით, 63 წლის კაცი დააკავა. კაცმა პარტნიორ ქალთან სქესობრივი კავშირის ამსახველი მასალა ქალის ოჯახის წევრებს გაუგზავნა.
სპეციალური საგამოძიებო სამსახურის განცხადებით, გამოძიებით დადგინდა, რომ 1981 წელს დაბადებული დაზარალებული ქალი სასიყვარულო/ინტიმურ ურთიერთობაში იმყოფებოდა 1960 წელს დაბადებულ ბრალდებულთან, რომელიც მათ შორის არსებულ სქესობრივ კავშირს მობილური ტელეფონით იღებდა.
“მას შემდეგ, რაც დაზარალებულმა აღარ მოინდომა ურთიერთობის გაგრძელება ბრალდებულთან, ამ უკანასკნელმა, შურისძიების მოტივით, 2024 წლის თებერვლის თვეში, აპლიკაცია “Whatsapp”-ის გამოყენებით, ზემოაღნიშნული ინტიმური შინაარსის მასალა დაზარალებულის ოჯახის წევრს გადაუგზავნა”, — აღნიშნულია განცხადებაში.
როგორც სპეციალური საგამოძიებო სამსახური აცხადებს, მათ ბრალდებული და მისი საცხოვრებელი სახლი გაჩხრიკეს. დაზარალებულის ინტიმური შინაარსის მასალის ამოღების შემდეგ კი, კაცი დააკავეს. მას პირადი ცხოვრების საიდუმლოს ხელყოფისთვის ბრალდება წარედგინა და აღკვეთის ღონისძიების სახით პატიმრობა შეეფარდა.