კვირას, 15 ოქტომბერს, 20:00 საათზე, პარლამენტთან მდუმარე აქცია — “ბავშვი ცოლი არ არის!” გაიმართება. აქციის მიზანი საგარეჯოში მოკლული 14 წლის მოზარდის, აითაჯ შახმაროვასადმი სოლიდარობის გამოხატვა და იმ ბავშვებისა თუ ქალების მხარდაჭერა და დახმარებაა, რომლებიც ახლაც განიცდიან ნებისმიერი სახის ძალადობას.
“მიუხედავად იმისა, რომ პედოფილია, ნაადრევი ქორწინება, თავისუფლების უკანონო აღკვეთა და სექსუალური ძალადობა დანაშაულია, საზოგადოების გარკვეულ წრეებში ამაზე არ საუბრობენ, მსხვერპლები დუმილს ამჯობინებენ, კანონის აღსრულება კი სათანადოდ არ ხდება. გელოდებით პარლამენტთან, მდუმარე აქციაზე, სადაც სიმბოლურად, აქციის მონაწილეებს თან ექნებათ თოჯინები და სხვადასხვა სათამაშო”, — აღნიშნულია ღონისძიების აღწერაში.
14 წლის მოზარდი 6 ოქტომბერს, საგარეჯოში მოკლეს. გამოძიების ვერსიით, აითაჯი იმ კაცმა მოკლა, რომელზეც 2 თვის წინ, იძულებით დააქორწინეს. მომხდარის შემდეგ ბრალდებული მიიმალა და 10 ოქტომბერს დააკავეს. ბრალდებულს წინასწარი პატიმრობა შეეფარდა და ბრალად ედება განზრახ მკვლელობა არასრულწლოვანი ოჯახის წევრის მიმართ, ჩადენილი გენდერის ნიშნით, ცეცხლსასროლი იარაღის მართლსაწინააღმდეგო ტარება, თავისუფლების უკანონო აღკვეთა დამნაშავისათვის წინასწარი შეცნობით არასრულწლოვანის მიმართ, რაც 16-დან 20 წლამდე ან უვადო პატიმრობას ითვალისწინებს. 11 ოქტომბერს კი მოკლული მოზარდის ბიძა და დედაც დააკავეს, რომელთაც ბრალად ქორწინების იძულება და დანაშაულის შეუტყობინებლობა ედებათ, რაც 6 წლამდე თავისუფლების აღკვეთას ითვალისწინებს.