მწერლები, მთარგმნელები, გამომცემლები და ლიტერატურის სფეროში დასაქმებული ადამიანები ერთობლივი წერილით გმობენ საქართველოს ხელისუფლების გადაწყვეტილებას, რომ “ხელახლა სცადოს რუსული კანონის ქართველი ხალხისთვის თავს მოხვევა”. წერილს პენცენტრი აქვეყნებს.
წერილზე ხელმომწერები აცხადებენ, რომ საქართველოს ხელისუფლება და მმართველი პარტია აღნიშნული ქმედებით ქართველი ხალხის წინაშე აღებულ ანგარიშვალდებულებაზე ამბობს უარს და ქართველი ერის ევროპული მომავლის წინააღმდეგ მოღალატეობრივ ნაბიჯს დგამს.
“ამ ნაბიჯით საქართველოს ხელისუფლება საკუთარი ნებით დეკლარირებულად ამბობს უარს მოლდოვასთან და უკრაინასთან ერთად ისარგებლოს ევროკავშირის გაფართოების ისტორიული შესაძლებლობით. გაცემული სიტყვის გატეხა, მეგობრების გასაჭირში მიტოვება, მტერთან კოლაბორაცია, ძლიერთან ქედის მოხრა, ხოლო სუსტების ჩაგვრა, არასდროს ყოფილა და ვერასდროს იქცევა ქართული სულის და ხასიათის ნაწილად. ქართული ლიტერატურა ყოველთვის გამოხატავდა ქართველი ხალხის ფუნდამენტურ რწმენებს და ღირებულებებს, მის რწმენას წინ აღდგომოდა დამპყრობლებს, დაეცვა დაჩაგრული, გაემარჯვა სიკვდილზე და ებრძოლა თავისუფლებისთვის.
მოვუწოდებთ ქართველ ხალხს, არავითარ შემთხვევაში არ შეეგუონ სიტყვის გამტეხელ, ნებაყოფლობით გარუსებული მოღალატეების ძალმომრეობას და საქართველოს სახელმწიფოებრიობის ღალატს და ყველა შესაძლო ფორმით და მეთოდით წინ აღუდგნენ საქართველოს რუსიფიკაციის მორიგ მცდელობას. დასასრულს შეგახსენებთ, რომ 9 აპრილიდან 35 წლის თავზე ჩვენ ისევ რუსეთის წინააღმდეგ ვიბრძვით, რადგან ამ დღის გმირებმა საქართველოს დამოუკიდებლობა და თავისუფლება საკუთარი სიცოცხლის ფასად მოუტანეს და მისი დაცვა დღეს ჩვენი, საქართველოს თითოეული მოქალაქის ვალია”, — აღნიშნულია წერილში.
წერილს 54 მწერალი, მთარგმნელი, გამომცემელი და ლიტერატურის სფეროში დასაქმებული ადამიანი აწერს ხელს: გვანცა ჯობავა, ანა ჯავახიშვილი, ბექა ქურხული, დალილა გოგია, რატი მუჯირი, ზაზა კოშკაძე, პაატა შამუგია, ზაალ ანდრონიკაშვილი, ზურა პაპიაშვილი, ნიკი თარხან-მოურავი, ეკატერინე ტოგონიძე, ბესო სოლომანაშვილი, ნინო ბექიშვილი, ნატო ალხაზიშვილი, ტორესა მოსი, თამარ ლონდარიძე, ნიკოლოზ აგლაძე, ლელა კოდალაშვილი, ირინე ჭოღოშვილი, ნატო გორდელაძე, ანა კოპალიანი, მაკა კასრაძე, თინა მამულაშვილი, ლაშა ბუღაძე, ნათია გიორგაძე, მაგდა ნოვაკოვსკა, დარეჯან კიკოლიაშვილი, ნატო კვარაცხელია, ანა ჭაბაშვილი, მარინე ცხადაია, ირაკლი ლომოური, რუსუდან რუხაძე, ვასო გულეური, ნუკა ღამბაშიძე, ლელა შუბითიძე, ნინა სურამელაშვილი, თამთა მელაშვილი, მედეა იმერლიშვილი, შოთა იათაშვილი, მაშო სამადაშვილი, ნატა ლომოური, ხათუნა ცხადაძე, კოკა ქამუშაძე, რატი ამაღლობელი, მაიკო დანელია, იაკი კაბე, ბელა ჩეკურიშვილი, ლელა დუმბაძე, მაკო ჯანჯიბუხაშვილი, ანა მარგველაშვილი, დათო გორგილაძე, ზვიად კვარაცხელია და არჩილ ქიქოძე.
ასევე ნახეთ: