ინტიმურობისა და სექსუალური სურვილების გამოკვლევას დიდი ცნობისმოყვარეობა და ბევრი კითხვა ახლავს თან, განსაკუთრებით მაშინ, როცა საქმე ანალურ სექსს ეხება. ანალური სექსი, რომელიც ხშირად ტაბუდადებულია, ბევრი ადამიანისთვის სიამოვნების წყაროა, თუმცა ბევრისთვის — შიშის, სირცხვილისა თუ მცდარი წარმოდგენების.

ამ სტატიაში იხილავთ ხშირად დასმულ კითხვებს ანალურ სექსთან დაკავშირებით და მნიშვნელოვან რჩევებს დამწყებთათვის. განურჩევლად იმისა, გაინტერესებთ, როგორი შეგრძნებაა ანალური სექსი, როგორ უნდა მოემზადოთ მისთვის თუ გაშინებთ პოტენციური ტკივილი ან დისკომფორტი, ეს სტატია შეეცდება, პასუხი გასცეს თქვენს კითხვებს და მაქსიმალურად მოგამზადოთ იმისთვის, რომ უსაფრთხო და სასიამოვნო გამოცდილება მიიღოთ.

მტკივნეულია თუ არა ანალური სექსი?

ალბათ, ერთ-ერთი მთავარი კითხვა პირველ ანალურ სექსამდე და პირველი შიში — მოსალოდნელი ტკივილი. სიმართლე ისაა, რომ ანალური სექსი მტკივნეული არ უნდა იყოს, თუკი ყველაფერს სწორად აკეთებთ. წინასწარ შემზადება, ვარჯიში და მცირეოდენი მოთმინება სრულიად საკმარისი იქნება სასიამოვნო და დასამახსოვრებელი პირველი გამოცდილების მისაღებად.

მოდით, ვუპასუხოთ რამდენიმე შესაძლო შეკითხვას.

რა შემთხვევაშია ანალური სექსი მტკივნეული?

პირველ ყოვლისა, უნდა გავითვალისწინოთ, რომ ანალურ ხვრელს არ აქვს ბუნებრივი ლუბრიკაცია (სისველე). ვაგინისგან განსხვავებით, რომელიც აღგზნებისას სექსის მოლოდინში სველდება, ანუსის შემთხვევაში ასე არ ხდება. საკმარისი სისველის გარეშე კი მშრალი პენეტრაციით („შეღწევით“) გამოწვეული ხახუნი მტკივნეულია და მან შეიძლება ანუსის კანში პატარა ნახეთქებიც წარმოშვას.

ტკივილის კიდევ ერთი მიზეზი შეიძლება გახდეს დაძაბულობა. თუკი მოდუნებული არ ხართ, ანალური სფინქტერი (მომჭერი კუნთი) დაჭიმული იქნება და პენეტრაციას შეიძლება დისკომფორტი და ტკივილი მოჰყვეს. ეცადეთ, სექსის პროცესში კარგად მოდუნდეთ, გამოიჩინეთ მოთმინება, არ იჩქაროთ და ანალურ პენეტრაციაზე არ გადახვიდეთ მანამ, სანამ არ იქნება საამისოდ საკმარისად მზად და აღგზნებული. კუნთების მოსადუნებლად ასევე შეგიძლიათ სექსამდე ცხელი შხაპი ან აბაზანა მიიღოთ.

► ტკივილის შემთხვევაში, ის, როგორც წესი, აქტის დასრულებიდან მალევე უნდა გაქრეს. თუკი ძალიან ძლიერი ტკივილი გაქვთ ან ის რამდენიმე დღე გრძელდება, აუცილებლად მიმართეთ ექიმს.

შეიძლება თუ არა, წამოვიდეს სისხლი?

კი, შეიძლება. პირველ ჯერზე მცირეოდენი სისხლი, როგორც წესი, პრობლემას არ წარმოადგენს და მას შეიძლება ანალური ხვრელის გაღიზიანება იწვევდეს. თუკი აქტის დროს რამდენიმე მოვარდისფრო წვეთზე უფრო მეტს ხედავთ ან თუკი ასეთი სისხლი აქტიდან რამდენიმე დღის შემდეგაც გაქვთ, თავის დაზღვევის მიზნით აჯობებს, მიმართოთ ექიმს. სისხლდენას შეიძლება იწვევდეს სექსის დროს ხახუნი და სიუხეშე, თუმცა ის ასევე შეიძლება რაღაც სხვა პრობლემაზე მიუთითებდეს, მაგალითად, ბუასილზე.

როგორ შევამცირო ტკივილი და დისკომფორტი?

გახსოვდეთ, რომ თავიდან მცირეოდენი ტკივილი და დისკომფორტი მოსალოდნელია, რადგან ანუსს დრო სჭირდება პენეტრაციასთან მისაჩვევად. დისკომფორტისა და ტკივილის მინიმუმამდე დასაყვანად:

• გამოიყენეთ ბევრი ლუბრიკანტი — როდესაც საქმე ანალურ სექსს ეხება, ლუბრიკანტი (ინტიმური საცხი) აუცილებელია. ის მინიმუმამდე ამცირებს ხახუნს და ბევრად უფრო მარტივს და სასიამოვნოს ხდის პენეტრაციას. ლუბრიკანტი უნდა წაუსვათ პენისს (ან სექს-სათამაშოს), ასევე ანუსის შემოგარენს, შემდეგ კი ცოტა კიდევ დაამატოთ, რადგან ლუბრიკანტი ზედმეტი არასდროსაა!
• დაიწყეთ ძალიან ნელა — როგორი სურვილი და ენთუზიაზმიც არ უნდა გქონდეთ პირველი ანალური სექსისთვის, ეს აუცილებლად არ ნიშნავს იმას, რომ მისთვის ფიზიკურად ხართ მზად. იმისთვის, რომ თქვენი პირველი გამოცდილება სასიამოვნო და უმტკივნეულო იყოს, მნიშვნელოვანია, რომ ყველაფერი დაიწყოთ ნელა და ფრთხილად. თუკი ნელა დაწყების შემთხვევაშიც დიდ დისკომფორტს გრძნობთ, გადადით რამე უფრო მარტივზე, მაგალითად, ლუბრიკანტიანი თითით მასაჟზე ან პატარა სექს-სათამაშოზე.

როგორი შეგრძნებაა ანალური სექსი?

შეუძლებელია იმის ზუსტად აღწერა, თუ როგორი შეგრძნებაა ანალური სექსი. ამაში მნიშვნელოვან როლს ასრულებს არაერთი ფაქტორი, დაწყებული ადამიანის ინდივიდუალური ანატომიით და დამთავრებული თქვენი პრეფერენციებით, სურვილებითა და სექსუალური გამოცდილებებით.

ამ კითხვაზე მაქსიმალურად ახლო პასუხის გასაცემად ქვემოთ განვიხილავთ, პოტენციურად როგორი შეგრძნება შეიძლება იყოს ანალური სექსი ადამიანის ანატომიის მიხედვით.

თუკი პროსტატა გაქვთ

სისგენდერ (ის, ვისი გენდერული იდენტობაც შეესაბამება მისთვის დაბადებისას მინიჭებულ სქესს) კაცებსა და იმ ადამიანებს, რომლებსაც დაბადებისას მამრობითი სქესი მიენიჭათ, აქვთ პროსტატა, ანუ წინამდებარე ჯირკვალი. მართალია, ამ პატარა ჯირკვლის მთავარი დანიშნულება სპერმისთვის საჭირო სითხის წარმოება და სპერმის გადაადგილებაა, მაგრამ ის ასევე მგრძნობიარე ნერვული დაბოლოებებითაა სავსე და სტიმულაციისას ძალიან სასიამოვნო შეგრძნებებს აღძრავს.

ანალური პენეტრაციის დროს პროსტატამდე მისვლამდე ანუსის გარშემო და მის შიგნით არსებულ ნერვულ დაბოლოებებთანაც მოხდება კონტაქტი. თუკი ამ შეგრძნებას მიჩვეული არ ხართ, შესაძლოა, თავიდან ის ცოტათი არაკომფორტული მოგეჩვენოთ. ეს საწყისი პენეტრაცია ხშირად აღიწერება, როგორც „შებრუნებული დეფეკაციის“ შეგრძნება, თუმცა ბევრად უფრო სასიამოვნო.

► ანალური პენეტრაციის დროს საკმაოდ ხშირია იმის შეგრძნება, თითქოს დეფეკაცია გსურდეთ. ეს ნორმალურია, რადგან ამ დროს შეხება გაქვთ იმავე ნერვულ დაბოლოებებსა და კუნთებთან, რომლებიც დეკეფაციაში მონაწილეობენ.

პროსტატამდე მისვლისას ხდება მისი სტიმულაცია, რაც, როგორც წესი, აქტის ყველაზე სასიამოვნო ნაწილია. ამ დროს სხეულში მიმდინარე ბუნებრივი პროცესების შედეგად პროსტატისკენ სისხლის მიმოქცევა იზრდება, რაც ჯირკვალს ზომაში ზრდის და უფრო მგრძნობიარეს ხდის.

► ზოგ ადამიანს ამ დროს უჩნდება შეგრძნება, თითქოს მოშარდვა უნდა, თუნდაც შარდის ბუშტი ცარიელი იყოს. ამას იწვევს ის, რომ პროსტატა შარდის ბუშტის წინ მდებარეობს. ეს შეგრძნება ძალიან ხშირი და აბსოლუტურად ნორმალურია.

თუკი არ გაქვთ პროსტატა

ანალური სექსით სიამოვნების მისაღებად პროსტატის ქონა აუცილებელი არ არის. ანუსის ირგვლივ და შიგნით ყველას ერთნაირი რაოდენობის სასიამოვნო ნერვული დაბოლოებები აქვს. გარდა ამისა, ანუსიდან არაპირდაპირ შეიძლება ვაგინალური არხის კედლებისა თუ სასიამოვნო წერტილების სტიმულაცია. უშუალოდ პენეტრაციის შეგრძნება ისეთივეა, როგორც პროსტატის ქონის შემთხვევაში იქნებოდა.

ანალური სექსით ორგაზმს მივაღწევ?

ანალური სექსით ორგაზმის მიღწევა ნამდვილად შესაძლებელია. თუკი პროსტატა გაქვთ, მის სტიმულაციას შეუძლია პროსტატის ორგაზმის მოგვრა. პროსტატის ორგაზმი იწვევს განგრძობით შეკუმშვებს, რომლებიც სიამოვნების ინტენსიური ტალღებს გზავნის მთელს სხეულში.

► ზოგ ადამიანს პროსტატის ორგაზმის დროს პენისიდან რძისფერი ბლანტი სითხე გამოეყოფა, რომელსაც პროსტატის სითხე ეწოდება. ეს აბსოლუტურად ნორმალურია.

თუმცა, ანალური ორგაზმისთვის პროსტატის ქონა აუცილებელი არ არის. პენისით ან სექს-სათამაშოთი ანალურ სექსს შეუძლია არაპირდაპირ ასტიმულიროს ვაგინის კედლები და მათში არსებული მგრძნობიარე უბნები, რასაც პოტენციურად შეუძლია ვაგინის დასველება და ძლიერი ორგაზმის მოგვრა.

► სასიამოვნო ანალური სექსისა და ორგაზმისთვის ძალიან მნიშვნელოვანია აღგზნებისა და მოდუნების სწორი თანაფარდობა, ამიტომ მაქსიმალურად ეცადეთ, შესაფერისი განწყობა შეიქმნათ. მიიღეთ ცხელი აბაზანა, შეეხეთ თქვენს ეროგენულ ზონებს ან უყურეთ სასურველ პორნოგრაფიას.

როგორ მოვემზადოთ ანალური სექსისთვის?

ანალურს სექსს სხვა სექსუალურ აქტებთან შედარებით უფრო მეტად სჭირდება მომზადება, განსაკუთრებით პირველი ჯერისთვის. ქვემოთ მოცემულია რამდენიმე რჩევა, რომელიც ანალური სექსისთვის მომზადებაში დაგეხმარებათ:

• მიიღეთ ცხელი შხაპი და მოწესრიგდით ჰიგიენურად — ანალური ხვრელი თავისთავად არც ისე სუფთა ადგილია. სექსამდე ტუალეტში გასვლა, ასევე ცხელი შხაპი და ანუსის საპნით დაბანა დაგეხმარებათ მის გასუფთავებაში. ეს, როგორც წესი, საკმარისია, თუმცა თუ მაინც ნერვიულობთ სისუფთავეზე, შეგიძლიათ, დამატებით ანალური ხვრელის გამორეცხვაც გაიკეთოთ. ამისთვის დაგჭირდებათ მცირე ზომის ოყნა და ნელ-თბილი წყალი. მეტი სისუფთავისთვის სექსის დროს შეგიძლიათ დაიფინოთ მუქი ფერის პირსახოცი ან დამატებითი ზეწარი.
• ყურადღებით შეარჩიეთ ლუბრიკანტი — ლუბრიკანტი სამი ტიპის არსებობს: სილიკონის, ზეთის და წყლის.
  • სილიკონის ლუბრიკანტი ბლანტია და სხვა ლუბრიკანტებზე უფრო დიდხანს ძლებს, ამიტომ ანალური სექსისთვის ის საუკეთესოა. თუმცა, გასათვალისწინებელია, რომ თუკი სექსში სილიკონის სექს-სათამაშოების გამოყენებას აპირებთ, სილიკონის ლუბრიკანტი არ უნდა გამოიყენოთ, რადგან ის მათ აზიანებს. ამისთვის გვერდის ასავლელად შეგიძლიათ სექს-სათამაშოს პრეზერვატივი წამოაცვათ.
  • ზეთის ლუბრიკანტი (მაგალითად, ქოქოსის ზეთი ან ვაზელინი) არ არის უსაფრთხო ლატექსის პრეზერვატივებთან ერთად გამოსაყენებლად, რადგან ზეთმა შეიძლება დაშალოს ლატექსი და ხელი შეუშალოს პრეზერვატივების ეფექტურობას. ზეთის ლუბრიკანტი შეგიძლიათ ისეთი სექსის დროს გამოიყენოთ, სადაც უშუალოდ ხდება კანით კანზე შეხება.
  • წყლის ლუბრიკანტი, ზოგადად, ყველაზე უსაფრთხო ვარიანტია, რადგან მისი გამოყენება შეიძლება როგორც პრეზერვატივთან, ისე სექს-სათამაშოებთან ერთად. თუმცა, ის შედარებით უფრო ნაკლებად ბლანტია და სხვა ლუბრიკანტებზე ნაკლებად დიდხანს ნარჩუნდება.
• ესაუბრეთ პარტნიორს — პირველი ანალური სექსი ისეთი რამ არაა, რაც უეცრად და დაუგეგმავად უნდა მოხდეს. ძალიან მნიშვნელოვანია ღია და გულწრფელი საუბარი პარტნიორებს შორის, რათა დარწმუნდეთ, რომ ორივენი ყველაფერზე თანხმდებით. პარტნიორთან საუბარი ასევე დაგეხმარებათ ცხადი საზღვრების დადგენაში. ამ დროს შეგიძლიათ განიხილოთ თქვენი შიშები, კომპლექსები, მოლოდინები თუ სურვილები. გაქვთ რამე ფანტაზია, რომელიც აღგაგზნებთ? ისაუბრეთ მასზე. მთავარია, თავს კომფორტულად გრძნობდეთ და მზად იყოთ იმისთვის, რაც აქტის დროს მოხდება.

► გახსოვდეთ, რომ ანალურ თუ ნებისმიერი სხვა ტიპის სექსამდე ან სექსუალურ აქტივობამდე აუცილებელია ყველა მონაწილის თანხმობა. 

• ეცადეთ, მოდუნდეთ — მოდუნება აუცილებელია იმისთვის, რომ პროცესი სასიამოვნო იყოს თქვენთვისაც და თქვენი პარტნიორისთვისაც. შეგიძლიათ, ამისთვის მიიღოთ ცხელი აბაზანა, დაკავდეთ მასტურბაციით, პარტნიორს სთხოვოთ მასაჟის გაკეთება და დაკავდეთ პრელუდიით, მათ შორის კოცნით, ეროგენული ზონების სტიმულაციითა და ორალური სექსით.
• დაიწყეთ ნაბიჯ-ნაბიჯ — უმჯობესია, პირველივე, რაც თქვენს ანალურ ხვრელში მოხვდება, პენისი ან დილდო არ იყოს. ჯერ დაიწყეთ რამე უფრო პატარით, მაგალითად, პატარა სექს-სათამაშოთი ან თითებით, შემდეგ კი ნაბიჯ-ნაბიჯ შეგიძლიათ გაზარდოთ ზომა. ორივე შემთხვევაში გამოიყენეთ ბევრი ლუბრიკანტი. გარდა ამისა, გაითვალისწინეთ, რომ თუკი თქვენ ან თქვენი პარტნიორი ანუსის თითებით სტიმულაციას აპირებთ, აუცილებელია ფრჩხილების დაჭრა, რათა ანუსის კედლები არ დაზიანდეს და არ გამოიწვიოს სისხლდენა.
• საჭიროების შემთხვევაში, გააკეთეთ ანალური ვარჯიშები — „ანალურ ვარჯიშებში“ იგულისხმება აქტამდე ანუსის ნელ-ნელა გაფართოება და მისი მომზადება ანალური სექსისთვის. ამის გაკეთება შეგიძლიათ ანალური საცობების (ე.წ. „ბატ-პლაგი“; ინგლ Butt-plug) მეშვეობით — ჯერ დაიწყებთ უფრო მცირე ზომის სათამაშოთი, მიჩვევის შემდეგ კი ნელ-ნელა გაზარდეთ ზომას, თქვენი კომფორტის შესაბამისად.

როგორ მოვიქცე ანალური სექსის დროს?

ქვემოთ მოცემულია რამდენიმე რჩევა, თუ რა უნდა გაითვალისწინოთ უშუალოდ ანალური სექსის პროცესში:

• გამოიყენეთ ბევრი ლუბრიკანტი — როგორც უკვე აღვნიშნეთ, ანუსს არ აქვს ბუნებრივი სისველე, ამიტომ ანალური სექსის დროს აუცილებელია ბევრი ლუბრიკანტის გამოყენება, რათა პროცესი იყოს უმტკივნეულო და უსაფრთხო. ლუბრიკანტი წაუსვით როგორც ანუსის შემოგარენს, ისე პენისის ან სექს-სათამაშოს თავს. არ მოგერიდოთ ლუბრიკანტის დიდი რაოდენობით გამოყენების, განსაკუთრებით პირველ ჯერზე.
• დაიწყეთ ნელა — ანალურ ხვრელს ძალიან ნაზი კედლები აქვს და პირველ ჯერზე პირდაპირ სწრაფად ან ძლიერად დაწყებამ შეიძლება ისინი დააზიანოს და გამოიწვიოს სისხლდენა, რაც მტკივნეულს ხდის სექსს და ზრდის ინფექციების გავრცელების შანსს.
• გამოხატეთ საკუთარი თავი — სექსში სიჩუმის დრო არ არის, განსაკუთრებით, როცა რაღაც სიახლეს პირველად აკეთებთ. აქტიური კომუნიკაცია იქონიეთ პარტნიორთან სექსის დროს და გააგებინეთ, რა მოგწონთ, რა არ მოგწონთ. თუკი არაკომფორტულად გრძნობთ თავს ან გტკივათ, აუცილებლად გამოხატეთ ეს. კომუნიკაცია ორივეს დაგეხმარებათ, გახდეთ უკეთესი პარტნიორები და მეტი სიამოვნება მიიღოთ სექსისგან.
• შეარჩიეთ სწორი პოზა — როდესაც საქმე ანალურ სექსს ეხება, პოზის ოდნავ ცვლილებაც კი შეიძლება ძალიან მნიშვნელოვან სხვაობას იძლეოდეს. თუკი თავს კომფორტულად არ გრძნობთ, შეცვალეთ პოზა ან უკეთ მოთავსდით იმავე პოზაში. ანალური სექსისთვის ერთ-ერთი ყველაზე კომფორტული პოზაა ე.წ. „დოგი-სთაილი“ (ინგლ. Doggy style) — როდესაც ერთი პარტნიორი მუხლებზე დგას, გადახრილია და იდაყვებით ან ხელისგულებით ეყრდნობა ზედაპირს, მეორე კი უკნიდან პენისით ან სექს-სათამაშოთი ახდენს პენეტრაციას (“შეღწევა”).
• დაიცავით თავი! — ანალური სექსით სქესობრივი გზით გადამდები ბევრი ინფექცია (სგგი) ვრცელდება, მათ შორის, აივ-ინფექცია, რომელიც ყველაზე ხშირად სწორედ ანალური სექსით გადადის. ამიტომ ძალიან მნიშვნელოვანია, გამოიყენოთ პრეზერვატივი. გარდა ამისა, მნიშვნელოვანია, რომ სექსამდე თქვენს პარტნიორს ესაუბროთ მისი სგგი-ების სტატუსისა და ტესტირების შესახებ. ასევე კარგი იქნება, თუ თავადაც ხშირად შეემოწმებით სგგი-ებზე.

► აივ-ინფექციის უფასო სწრაფი ტესტის გაკეთებას „თანასწორობის მოძრაობის“ ოფისში შეძლებთ, მისამართზე: უშანგი ჩხეიძის ქუჩა #19. ვიზიტამდე შეგიძლიათ ორგანიზაციას დაუკავშირდეთ ტელეფონით (0322 47 97 48) ან Facebook-ზე

► გაითვალისწინეთ, რომ თუკი ანალური სექსიდან ვაგინალურ ან ორალურ სექსზე აპირებთ გადასვლას, აუცილებლად გამოცვალეთ პრეზერვატივი და კარგად გაასუფთავეთ ხელები, სასქესო ორგანოები თუ სექს-სათამაშოები. ანალური ხვრელის ბაქტერიებს ვაგინის მიკროფლორის დაზიანება და სხვადასხვა ინფექციის გამოწვევა შეუძლია.

ანალური სექსის შემდეგ

პირველი ანალური სექსის შემდეგ საჭიროა ჰიგიენის დაცვა. შხაპის მიღება ან, როგორც მინიმუმ, ანუსისა და სასქესო ორგანოების კარგად დაბანა მნიშვნელოვანია საიმისოდ, რომ ბაქტერიები არ გავრცელდეს. ასევე გულდასმით დაიბანეთ ხელები და გაასუფთავეთ სექს-სათამაშოები, თუკი ისინი გამოიყენეთ.

► გაითვალისწინეთ, რომ აუცილებლად უნდა მიმართოთ ექიმს, თუკი სექსის შემდეგ:

• შეამჩნევთ სისხლდენას, განსაკუთრებით მაშინ, თუ ის ძლიერია ან ერთ-ორ დღეზე მეტხანს გრძელდება;

• გაქვთ ინფექციის ნიშნები, მაგალითად, გამონაყარი, სიწითლე ან შეშუპება ანუსის გარშემო, ასევე, სიცხე, დაღლილობა ან კუნთების ტკივილი.

გარდა ამისა, გაატარეთ დრო თქვენს პარტნიორთან. როდესაც ყველაფერს მორჩებით, შეგიძლიათ პარტნიორს ჩაეხუტოთ და ესაუბროთ მიღებულ გამოცდილებაზე, განცდილ შეგრძნებებზე, გაკეთებულ აქტივობებზე, პოტენციურ ცვლილებებზე შემდეგი ჯერისთვის ან, სულაც, იმაზე, გინდათ თუ არა, რომ ოდესმე კიდევ დაკავდეთ ანალური სექსით. ანალური სექსი შეიძლება სასიამოვნო იყოს, მაგრამ ეს არ ნიშნავს, რომ ის ყველას მოსწონს ან ყველასთვის შესაფერისია. თუკი მას ცდით და აღმოაჩენთ, რომ სათქვენო არ არის, ეს აბსოლუტურად ნორმალურია. არავის მისცეთ ნება, გიბიძგოთ რაიმე ისეთი აქტივობით დაკავებისკენ, რომელიც არ გსურთ ან რომელიც თქვენთვის არაკომფორტულია. აკეთეთ ის, რაც გსიამოვნებთ.

წყარო: Healthline — What does anal sex feel like?, Does anal sex hurt?